*

شَجْرَة صْغِيرَة وسْط الرِّيحْ

القَلْبْ

شَجْرَة تْهِبّ الرِّيحْ عْلِيهَا..

شَجْرَة صْغِيرَة وسْط الرِّيحْ

الحُبّْ

هُوَّ اللِي يَقْدَرْ يحْمِيهَا...

*

لَعْصَافِرْ تِكْبِرْ و تْط‏يرْ

تْخَلِّي وْرَاهَا بَعْض الرِّيشْ

و الشَّجْرَة , فِي الشَّارِعْ لِكْبِيرْ

عَطْشَانَة وِ تْحِبّ تْعِيشْ

 وْ قَلْبِي كِي الشَّجْرَة عَطْشَانْ

يِشْكِي وْ لاَ مِنْ يعْلِمْ بِيهْ

يِتْمَنَّى تِبْكِي الأَغْصَانْ

لَعَلَّ الدَّمْعَة تِسْقِيهْ

لَكِنْ دِيمَا الشَّجْرَة خَضْرَا

وْ كِي حَبِّيتْ فْهِمْت عْلاَشْ

مَهْمَا عَاشْ اللِي مَا حَبِّشْ

كَايِنُّه عُمْرُه مَا عَاشْ..

*

شَجْرَة تُخْزُرْ لِلعُشَّاقْ

فِي الشَّارِعْ , إثْنِينْ اثْنِينْ

وْ تِتْنَهِّدْ مْنِ الأَوْرَاقْ

وْ تسْأَلْ عْصَافِرْهَا فِينْ

وْ قَلْبِي كِي الشَّجْرَة مَجْرُوحْ

يِتْمَنَّى عِشْقُه يْدَاوِيهْ

مُمْكِنْ لَوْ تَعْشَقْ الرُّوحْ

المَيِّتْ , عِشْقُه يِحْيِيهْ

لَكِنْ دِيمَا الشَّجْرَة خَضْرَا

وْ كِي حَبِّيتْ فْهِمْتْ عْلاَشْ

مَهْمَا عَاشْ اللِي مَا حَبِّشْ

كَايِنُّه عُمْرُه مَا عَاشْ...

 شعر: آدم فتحي

غناء لطفي بوشناق