*

فِي شْوَارِعْ لِمْدِينَة

تِتْكَلّمْ عِينِينَا

تَحْكِي عَ اللِي ظَاهِرْ

و تْخَبِّي حْقِيقِتْنَا عْلِينَا...

فِينْ اللِي يَقْدَرْ يِلْمِسْ لَحْقِيقَة

وْ هِيَّ مَرَّة جَمْرَة وْ مَرَّة حْرِيقَة ؟..

تِتْلاَقَى العِينِينْ وْفِيهَا

أَلْفْ حْكَايَة مَا تَحْكِيشْ

أَلْفْ مْرَايَة مَا تْوَرِّيشْ...

فِينْ اللِي يَقْدَرْ يِلْمِسْ لَحْقِيقَة

وْ هِيَّ مَرَّة جَمْرَة وْ مَرَّة حْرِيقَة ؟..

النَّاسْ أَسْرَارْ

فِي حْوَايِجْهُمْ مِتْخُبِّينْ

لِيلْ و نْهَارْ

فِي شْوَارِعْ لِمْدِينَة

 حْيُوطْ بِلاَّرْ

تْفَرَّقْ مَا بِينْ لِمْسَافْرِينْ

لِيلْ و نْهَارْ

آهْ مِنِّكْ يَا مْدِينَة

فِينْ اللِي يَقْدَرْ يِلْمِسْ لَحْقِيقَة

وْ هِيَّ مَرَّة جَمْرَة وْ مَرَّة حْرِيقَة ؟..

اللِي يِبْكِي و يْقُولْ لِكْ لاَبَاسْ

و اللِي يَضْحَكْ فِي سِرُّه عْلَى النَّاسْ

لِثْنِينْ

فِينَا مِتْخُبِّينْ...

و اللِي يَكْرَهْ و يْغَنِّي عَ الحُبّْ

و اللِي يْحِبّْ وْ مَا عِنْدُوشِي قَلْبْ

لِثْنِينْ

فِينَا مِتْخُبِّينْ...

فِينْ اللِي يَقْدَرْ يِلْمِسْ لَحْقِيقَة

وهيّ مرّة جمْرة ومرّة حْرِيقة؟؟

 شعر: آدم فتحي

غناء لطفي بوشناق