*

نْحِبِّكْ وانتِ نسّّايَةْ \ مِنْ وَقْت الصُغْرَةْ والقْرَايَةْ

*

نْحِبِّكْ آنَا \ مِنْ وَقْت اللِي سْكنْتُوا حْذَانَا

وشُفْت على خَدِّكْ رُمَّانَةْ \ كِي تحْكِي تْخَلِّينِي حْكَايَةْ

وكُنَّا صْغَارْ \ نْخافْ من الغُولْ ومِ الطهّارْ

ونحْشِمْ مِنْ خَزْرِةْ لِكبَارْ \ ونصْطَاد النجْمَةْ بِغْنَايَةْ

*

نْحبّك بَرْشَةْ \ مِ اللِي تْخَايِلْتِكْ في المَمْشَى

قَمْرَةْ حفْيَانَةْ تتْمَشَّى \ خْزَرت نْثَبّتْ شُفْتِكْ جَايَةْ

وكُنْت تْرَانِي \ وتَعْمِلْ عليَّ بِالعَانِي

قِنْدِيل باب مْنَارَةْ الثَانِي \ ما تضْوِي كَان عَ اللي حْذَايَ

*

وكلّ عْشِيّة \ كنت نْحبّكْ تُفْطُنْ بِيّ

نخرُجْ لِكْ لابِسْ شاشِيّة \ وبِدْعِيّةْ وجِبَّةْ قَمْرَايَةْ

وبِقْلَمَّاتِي \ نْزَيِّنْ رُوحِي بْشَنَبَاتِي

ونسْرَقْ لِكْ حُمِّيرْ خْوَاتِي \ ونْمَثِّلْ عِرْس وغَنَّايَةْ

*

أيَّامَاتْ \ وانا عايش كِي الباياتْ

فْمَكْتوبِي خَمْسَةْ بِيسَاتْ \ نحْسِبْ روحي ثَرْوَةْ مْعَايَ

رحْلةْ غْرِيبَةْ \ وما بين ضُحْكةْ ودمْعَةْ سْكيبَةْ

رِيتْ في شَعْرِي أوّل شِيبةْ \ فْطُنت بْصُغْرِي صار وْرَايَ

*

وهانِي اليومْ \ عايِشْ ما بِينْ يَقْظَةْ وْنُومْ

نُظْفُرْ مِ الذِكْرَى مَشْمُومْ \ نهْدِيهْ لْبِنْتِي بَحْذَايَ

وعَقْلِي سارحْ \ في سُؤالْ قْدِيمْ وْجارِحْ

شَعْمَلْنَا بأحْلامْ البارِحْ \ واشْ نَعْملْ باحْلامْنَا الجايَةْ؟

شعر: آدم فتحي

تلحين: حمّادي بن عثمان