لِـلَّـــــةْ يا جزائِر

*

لِلَّةْ , يَــا جَــزَائِرْ       يَــا وَرْدة الـرُّوحْ

نِـحْـلِـمْ يْـجِي يُومْ       عِطْر الـحُبّ يْـفُوحْ

شْـوَارعْ و حْكَايَـاتْ       تضْحَكْ فِـي العِينِينْ

وْ تِتْدَفَّى سَـاعَــاتْ       فِـي قَلْبِـكْ لَحْنِينْ

وِ انْتِ الحُوتْ عْلِيـكْ       مِِ الحَاسِدْ مَحْرُوسَـةْ

وَ احْنَـا بِينْ إِيدِيـكْ       نفْرَحْ بِيكْ عْرُوسَــةْ

وِ نْشُوفْ عْلَى بَابِـكْ       الغِيمَةْ تِتْجَلَّــــى

وْ مِنْ حَبِّـةْ تْرَابِـــكْ        نلْبِسْ أَحْلَى حُلَّـــةْ

لِلَّــةْ , يَـا لِلَّـةْ

*

لِلَّةْ , يَـا جَزَائِـــــرْ       يَا وَرْدة الــــرُّوحْ

نحْلِمْ يْجِـي يُـــــومْ       عِطْر الحُبّ يْـفُــوحْ

تْنَامْ بْيُـوت النَّــــاسْ       مَفْتُوحَه الـبِـيـبَـانْ

وَ عْلاَشْ الحُــــرَّاسْ       عَ القَلْب المُطْمَــــانْ

وْ نقْدَرْ مِنْ غِيرْ حِشْـمَـة        نُخْزُرْ فِـي عِينِـيـكْ

مِنْ غِيرْ مَا نْخَافْ مِنِّـكْ       وَ لاَ نْخَافْ عْلِـيـــكْ

وِ نْشُوفْ عْلَى بَابِــكْ       الغِيمَة تِـتْـجَـــلَّـى

وْ مِنْ حَبِّةْ تْرَابِـــكْ       نلْبِسْ أَحْلَى حُلَّـــــةْ

لِلَّــةْ , يَــا لِلَّــــةْ

*

لِلَّـة , يَا جَزَائِــــرْ       يَـا وَرْدة الـــرُّوحْ

نِحْلِمْ يْجِـي يُـــومْ       عِطْر الحُبّ يْفُـــوحْ

تِتْجَمَّـعْ لِقْلُـــوبْ       لاَ غُرْبَة وْ لاَ فُرْقَـــةْ

وْ لاَ دُخانْ حْــرُوبْ       تَحْت سْمَـانَـا الزَّرْقَـا

اللِّي عِنْدُه حْمَامَـــةْ      بْحَبِّـةْ قَمْحُـه ترْضَـى

وِ اللِي عِنْدُه مْنَامَــةْ       يْحَقَّقْهَا فِي اليَقْظَـــه

وِ نْشُوفْ عْلَى بَابِـكْ       الغِيمَة تِتْجَـلَّــــى

وْ مِنْ حَـبِّةْ تْرَابِـكْ       نلْبِسْ أَحْلَى حُلَّــــةْ

لِلَّـة , يَا  لِلَّـــة

*

لِلَّة , يا جَزَائِــــــرْ       يَا وَرْدة الـــرُّوحْ

لاَ زِ مْ  يْجِـي يُـــومْ       عِطْر الحُبّ يْفُـــوحْ

وْ نُصْرُخْ فِي المَــــدَى      بِالكِلْمَة الهَـــدَّارَةْ

دَمّ الشُّهَـــــــدَا       مَا رَاحِشْ خْسَــارَةْ

وْ مَهْمَـا عِشْنَـا وْ شُفْنَا       وْ خُفْنَا وِ تْخَـالِفْنَــا

حُضْنِكْ بَعْد غْيـــابْ       عَ الحُبّ  يْوَالِفْنَـــا

وِ نْشُوفْ عْلَى بَابِــكْ       الغِيمَة تِتْجَلَّـــــى

وْ مِنْ حَبِّةْ تْرَابِـــكْ       نلْبِسْ أَحْلَى حُلَّـــةْ

                                  لِلَّـة , يَا لِلَّـة

شعر: آدم فتحي

لحن: لطفي بوشناق

غناء: خالد

باريس.1999