مظلومة

*

مَظْلُومَةْ و دَمْعِـكْ عَ الخَـــدّْ     نَـلْحَــقْ دَمْعِي بْرِمْشْ عْيُـونِـي

   مَظْلُومَةْ وْ مَا ظلْمِـكْ حَـــدّْ     مَظْلُومَـة وْ طَـالْبَـةْ يْسَامْـحُونِـي

*

مِنْ صُغْـرِي نِشْرِقْ بالدَّمْعَـــةْ     وْ نِضْوِي عْلَى غِيرِي كي الشَّمْعَـةْ

وْ لَوْ مِ الشَّمْعَـةْ،  نْخَبِّي لَمْعَــةْ     نْخَافْ عْلَى الظَّلْمَـةْ يْحَاسْـبُونِـي

وَ اصْحَابِــكْ  ؟        كِي ذْبِلْتْ خْضـارُوا

وَ احْبَـابِــكْ ؟        حِبْسُونِي وْ طَــارُوا

وْ لَمَّا قُلْتْ لْشَمْسْ صْبــاحِـي     خَلِّينِـي نْـرَفْـرَفْ بِجْـنـاحِـي

زَادُونٍي رِيــحْ عْلَى رْيَـاحِـي      وْ لاَ عْجِبْهُمْ عَقْلِـي وْلاَ جْـنُونِـي

*

منْ صُغْرِي قَالُـوا لِي تْخَـبِّــي      وْ خَـبِّـي رِيحِـةْ وَرْدِكْ خَـبِّـي

وْحِبّــي اللِي نْقُولُولِكْ حِبّــي      وْ قُولِـي رْضَاكُمْ كُحْـلْ عْيُونِـي

وِ كْـبِـرْتِ  ؟          عْلَى غَـفْلَـةْ مِنِّـي

وِ صْـبَـرْتِ  ؟          عْلَى خِيبِـةْ ظَـنِّـي

وْ لَمّأ قُلْتْ لْأَهْلـي وْ نَاسِــي       لِـيَّ رَايِــي وْ لِـيَّ احْسَاسِـي

زرْعُوا جَمْرِتْـهُمْ فِي نْعَاسِــي      وْ بِكْلاَمْ العِيبَــةْ جَرْحُـونِــي

*

مِنْ صُغْـرِي وْ قَلْبِي عْلَى كَفِّي        نَعْطِيهُـمْ عُمْـرِي وِ نْوَفِّـــي

وْ يَا رِيتْ اللِي خْـذُوهْ يْكَفِّـي       حَتَّى عْلَى احْلاَمِي حِسْـدُونِــي

و حْلِمْـتِ   ؟           إِ  بْغُـنَّـايَـاتِـي

وِ نْدِمْـتِ   ؟           نْدِمْتْ عْلَى سْكَاتِي

وْ نِحْلِفْ بَايَّامِي اللِي جَايَــةْ          وْ بِلْيَـالِـي صَبْرِي وِ شْـقَـايَ

لاَ عَادْ نْخَبِّـي غُـنَّـايَــةْ          لاَ نْخَافْ النَّـاسْ يْلُومُونِـــي

شعر: آدم فتحي

لحن: لطفي بوشناق 

غناء ميشلين خليفة

تونس.2000